Informacion dhe këshillim për vende pune
 dhe kurse trajnimi 

Mundësi për të mësuar një profesion
dhe lehtësim punësimi për një periudhë 9 mujore

Në program përfshihen persona nga mosha 18-35 vjeç që kthehen nga emigracioni dhe migrantë të brendshëm që janë zhvendosur vitin e fundit nga zonat e thella rurale në periferitë e zonave të mëdha urbane.  Këtyre të rinjve u ofrohen alternativa për të mësuar një zanat pranë bizneseve të vogla ose vendosen në një vend pune dhe u paguhet një pjesë e pagës. Zakonisht kjo bëhet duke marrë edhe pëlqimin e të rinjve për të shmangur pakënaqësitë apo konfliktet e mëpasme me punëdhënësit dhe për të siguruar një riintegrim të tyre të qendrueshëm.

Mbështetje financiare për ndjekje studimesh të larta

Disa të rinj të kthyer nga emigracioni dhe që kanë filluar studimet e larta kanë përfituar një mbështetje financiare për një një vit akademik. Të drejtën e përfitimit e kanë ata studentë që vijnë nga rrethet dhe janë në vështirësi financiare.

Mbështetje financiare për kurse trajnimi

Kjo mbështetje u ofrohet atyre të rinjve, të cilët nuk dëshirojnë të përfshihen në skemën e punësimit apo marrjes së zanatit, por dëshirojnë të kryejnë kurse të ndryshme kualifikimi. Shoqata inkurajon gjithashtu të rinj që, pasi kanë mbaruar periudhën 9 mujore të marrjes së zanatit, kanë dëshirë të vazhdojnë kualifikime të mëtejshme.

Ndihmë financiare për raste të veçanta

Ndihmë financiare u ofrohet përfituesve të programit të riintegrimit profesional në raste të veçanta gëzimesh dhe hidhërimesh, me rastin e festave të fundvitit etj. Kjo bëhet për përfituesit që jetojnë në kushte të vështira ekonomike.

Këshillim psiko-social

Këshillimi psiko-social  ofrohet përmes një stafi të specializuar për këtë qëllim dhe u ofrohet personave në nevojë.

Aktivitete social-kulturore
në mbështetje të integrimit social

Riintegrimi social është një element shumë i rëndësishëm në skemën tonë të asistencës. Emigranti i kthyer ka nevojë të rigjejë rrënjët në një shoqëri që ka ndryshuar shumë që nga koha e largimit të tij. Për këtë arsye ne organizojmë takime periodike të quajtura “Shtëpia e Hapur” ku të rinjtë shkëmbejnë eksperiencat e jetës dhe kalojnë një kohë të gëzueshme në shoqërinë e njëri-tjetrit. Në këto takime trajtohen edhe tema të veçanta me interes për të rinjtë.

Aktivitetet kulturore, sportive dhe aktivitete të tjera të kohës së lirë janë elementë që ndihmojnë dhe shpejtojnë procesin e riintegrimit të emigrantëve të kthyer. Aktivitete të tilla përfshijnë ekskursione jashtë qytetit, në vende historike, ndeshje sportive, vajtje kolektive në kinema ose teatër, kremtime festash, dhënie çmimi për historinë më të mirë të emigrimit shkruar nga të rinjtë etj.

Parandalim emigrimi.
Aktivitete ndërgjegjësuese në shkollat e mesme

Shoqata organizon takime periodike me nxënës të shkollave të mesme dhe nxit debate e diskutime për problemin e emigracionit. Përfitues të projektit që kanë provuar përvojën e emigracionit janë të ftuar të tregojnë për eksperiencat e tyre dhe të bëhen apelues për të shmangur emigracionin e parregullt.