Kujt mund t’i shkonte nëpër mend shtatë vjet më pare se projekti “Kape të Ardhmen” do të vinte deri në ditën  e sotme?

Eshtë me të vërtetë një histori e mbushur me sukses, por le të mos harrojmë që, pa punën e zellshme dhe plot durim të një grupi të kualifikuar punonjësesh sociale, të udhëhequr nga një drejtuese shumë kompetente, Irena Dono Jorgaqi, projekti ynë do të ishte shuar me kohë…

 Në një letër të dërguar më datë 2 Mars 2004 Ministrja e Punëve të Jashtme të Zvicrës, Madam Micheline Calmy-Rey shkruante se ajo ishte shumë krenare që grupi i suksesshëm i Projektit “Kape të Ardhmen” përbëhet kryesisht nga gra. Eshtë meritë e tyre që zhvilluan një projekt për një target grup nga më të vështirët, të rinjtë shqiptarë të riatdhesuar, të cilët kishin lënë atdheun e tyre nga varfëria, me shpresën për të gjetur një jetë më të mirë diku gjetkë në Evropë.  

Kur kthej vështrimin pas në fillimet e projektit, i cili nisi në Prill 1999, në mes të luftës së Kosovës, më vjen ndër mend, që pas gjashtë muajsh ne thuajse u përgatitëm ta ndërprisnim këtë projekt, sepse pak të rinj të riatdhesuar na kishin ardhur në zyrë. Madje edhe ata me një mosbesim të madh, që një organizëm zviceran mund të kishte vullnetin e mirë për t’i ndihmuar të nisnin një jetë të re në Shqipëri, pasi ishin riatdhesuar nga policia zvicerane.

Sot Projekti “Kape të Ardhmen”, që është një projekt i shoqatës shqiptare “Shpresë për të Ardhmen” është i njohur si në Shqipëri ashtu edhe në Zvicër. Si themelues dhe koordinator i saj, unë shpresoj shumë që  Shpresë për të Ardhmen të jetë e aftë të “shqipërojë” këtë dhe projekte të tjera, duke u treguar kështu shqiptarëve se është diçka me vlerë të zhvillosh projekte, të cilat nuk kanë vetëm qëllime materiale, por qëllime dhe vizione më të gjëra për të ardhmen e një Shqipërie të begatë dhe normale. 

Me këtë rast do të dëshiroja të falenderoja të gjithë donatorët e panumërt, të cilët dhanë ndihmesën e tyre që në fillesë dhe në në rrjedhën e viteve.

Do të përmendja këtu veçanërisht Agjencinë Zvicerane të Kishave Protestante, HEKS, dhe personin përgjegjës  Madeleine Hirsch, SDC (Agjencia Zvicerane e Bashkëpunimit dhe Zhvillimit) në Tiranë dhe Bernë, EED (Agjencia për Zhvillim e Kishës Evangjeliste Gjermane)  dhe IOM Londër dhe IOM Tirana, të cilat kanë garantuar mbështetjen e tyre përgjatë këtyre viteve.

 Ne shpresojmë shumë se të gjithë donatorët në Zvicër, Gjermani dhe Angli do të vazhdojnë ta mbështesin këtë projekt të pazakontë, që nisi si një iniciativë private e si rrjedhojë e përvojës së mundimshme të një kapelani burgu në Zvicër, i cili e kuptoi se të rinjtë shqiptarë kishin nevojë për një perspektivë për të krijuar një të ardhme, pas kthimit forcërisht nga Evropa në Shqipëri.

 Dhe e fundit, por jo më  pak e rëndësishmja, unë do të falenderoja të gjithë të rinjtë e përfshirë në këtë projekt, që fituan besimin në vetvete, por gjithashtu edhe pronarët e bizneseve të vogla, të cilët patën mirësinë t’u jepnin këtyre të rinjve shqiptarë një shans për një fillim të ri në atdheun e tyre.

:: kthehu pas

© Copyright Shpresë për të Ardhmen 2006

ndertuar nga Kaligrafik.net